ปาโท นาม กหาปณสฺส จตุตฺถภาโคฯ มาสโก นาม ปาทสฺส ปญฺจมภาโคฯ ปาราชิกนฺติ วนปฺปติํ ฉินฺทนฺตสฺส ทุติยปาราชิกํ (ปารา. 110)ฯ อโนทิสฺสาติ ‘‘มนุสฺโส มรตู’’ติอาทินา น อุทฺทิสิตฺวาฯ เตนาติ วิเสนฯ

ภิกฺขุโนวาทกวคฺคสฺมินฺติ สามญฺญาธาโรฯ ทสสุ สิกฺขาปเทสูติ วิเสสาธาโรฯ ปฐมสิกฺขาปทมฺหิเยวาติ ทสสุ สิกฺขาปเทสุ ปฐมสิกฺขาปทมฺหิเยวฯ อุปสมฺปนฺนาย ภิกฺขุนิยาติ สมฺพนฺโธฯ ‘‘อาปตฺติ โหตี’’ติ อิมินา ‘‘จีวเรนา’’ติ ปทสฺส สมฺพนฺธฏฺฐานํ ทสฺเสติฯ

‘‘จตสฺโส เอวา’’ติ อิมินา ตตฺติกาติ เอตฺถ ตสทฺทสฺส วิสยํ ทสฺเสติฯ ตา จตสฺโส ปริมาณา ยาสํ อาปตฺตีนนฺติ ตตฺติกาฯ นิปนฺนสฺสาปิ ตตฺติกาติ เอตฺถาปิ เอเสว นโยฯ สาติ ภิกฺขุนีฯ

(3) ปาจิตฺติยวณฺณนา

[476] ปญฺจ เภสชฺชานีติ สพฺพิอาทีนิ ปญฺจ เภสชฺชานิฯ อิมํ อาปตฺตินฺติ สมฺพนฺโธฯ ปจฺฉา อาปนฺโนติ โยชนาฯ

เอกํ กพฬนฺติ เอกํ อาโลปํ, ตุมฺหมูเลติ ตุมฺหํ สนฺติเกฯ

ยถาวตฺถุกนฺติ วตฺถุอนุโลมํ, อาปตฺติโย เทสิตาว โหนฺตีติ โยชนาฯ

โกกาลิกาทีนนฺติอาทิสทฺเทน กฏโมทกติสฺสกาทโย (ปารา. 417) สงฺคณฺหาติฯ ปาปิกาย ทิฏฺฐิยา อปฺปฏินิสฺสคฺเค ปาจิตฺติยญฺจ จณฺฑกาฬิกาย ภิกฺขุนิยา ปาจิตฺติยญฺจาติ โยชนาฯ ปยุตฺตวาจาปจฺจยาติ วิญฺญตฺตินิมิตฺตาทีหิ ปกาเรน ยุตฺตาย วาจาย ปจฺจยาฯ อาปตฺติ ปาราชิกสฺสาติ ปาราชิกสฺส อาปชฺชนํฯ อถวา ปาราชิกสฺสาติ อสฺส ภิกฺขุสฺส ปาราชิกา อาปตฺติ โหตีติ วา ปาราชิกา อาปตฺติ อสฺส ภวตีติ วา โยชนา กาตพฺพาฯ อิตีติ อิมา ฉ อาปตฺติโย อาปชฺชตีติ โยชนาฯ